“All systems go” na ang probinsya sa Agusan del Sur alang sa pag-host sa Palarong Pambansa 2026, ang pinakaunang higayon nga ang maong dapit mahimong sentro sa nasudnong kompetisyon sa paugnat sa kusog. Sumala sa kagamhanang probinsyal, anaa na sa 80% ang ilang pagpangandam alang sa maong dakong kalihokan nga gilaumang tambongan sa dul-an 20,000 ka mga atleta, coach, ug mga opisyal gikan sa 18 ka rehiyon sa Pilipinas.
Gipahayag ni Governor Santiago Cane Jr. nga ang mga playing venues anaa na sa 85% nga kompleto, samtang ang mga billeting quarters o puy-anan sa mga delegasyon anaa na sa 73%. Bisan pa sa mga kabalaka sa krisis sa enerhiya tungod sa tensyon sa Middle East, gipasalig sa gobernador nga mopadayon ang preparasyon hangtod walay laing mando gikan sa nasyonal nga kagamhanan. Isip kabahin sa ilang pagdaginot, ipatuman ang “austerity measures” diin dili na mogasto og dako alang sa mga dekorasyon sa mga puy-anan.
Gikatakdang magsugod ang Palaro karong Mayo 24, diin mokusog usab ang seguridad pinaagi sa pagpadala og 2,000 ka personnel gikan sa PNP ug AFP. Gpahinumdoman usab sa probinsya ang pagdili sa “single-use plastics” sa tibuok gidugayon sa kompetisyon aron mapanalipdan ang kalikupan.