Gipahimangnoan ang mga biyahero sa peligro sa access road sa Overview, Quezon, Bukidnon tungod sa kalisod ug delikadong dalan nga nagdala og dugang alanganin sa biyahe. Sa pakighinabi sa Bombo Radyo Malaybalay, gipasabot ni Public Information Officer sa Quezon, Bukidnon nga si Forts Cabarde nga lisod ug delikado agian ang access road kay one-way lamang ug subidaon pa gyud kini, hinungdan nga dili angay gamiton alang sa regular nga trapiko.
Matod pa niini, mas luwas ug mas hapsay ang pag-agi sa Katipunan o sa opisyal nga detour road nga gihatag sa mga otoridad aron malikayan ang dugang kalangan ug aksidente. Gibutyag pa ni Cabarde ang iyang personal nga kasinatian sa maong dalan, diin iyang giestimar nga 30 minutos ang kalainan kung moagi sa detour road kumpara sa giingong access road sa Overview–Quezon na makahatag na sa mga biyahero ug hapsay na biyahe.
Sa pagkakaron, gidasig sa lokal nga gobyerno ang publiko nga mosunod sa gi-rekomendar nga agianan samtang padayon ang pagtrabaho sa opisyal nga dalan aron masiguro ang kaluwasan sa tanang pasahero.