Mitay og pag-usab ang magnitude 6.9 nga linog nga miigo sa Manay, Davao Oriental alas 7:12 sa gabii kagahapon sa gabie Biyernes, Oktubre 10, pipila lang ka oras human sa magnitude 7.4 nga linog nga nahitabo sa buntag. Ang bag-ong linog pareho sa kusog sa magnitude 6.9 nga linog nga miigo sa Cebu kaniadtong Setyembre 30, sumala sa Philippine Institute of Volcanology and Seismology (PHIVOLCS).
Ang episentro niini kay 36 kilometro habagatan-sidlakan sa Manay, Davao Oriental, nga may kalawmon nga 10 kilometro ug tectonic ang hinungdan.Nabati ang Intensity IV sa Davao City ug Bislig City, Surigao del Norte, samtang parehas usab nga kusog ang gibati sa Magpet, Cotabato; Digos City, Davao del Sur; Sta. Maria, Davao Occidental; Nabunturan, Davao de Oro; Gingoog City, Misamis Oriental; Malungon ug Alabel, Sarangani; Tupi, South Cotabato; ug Hinunangan, Southern Leyte.
Tungod niini, nagpagula ang PHIVOLCS og tsunami alert tungod sa posibilidad sa aftershock. Gibanabana nga ang unang bugso sa tsunami mahimong mahitabo tali sa alas 7:12 sa gabii hangtod alas 9:12 sa gabii, ug posible nga magpadayon pa ang dagkong balod sulod sa pipila ka oras, apan sa pipila ka oras gikan sa pagtay og sa linog gi kansela na ang maong anunsyu sa Tsunami.
Gipasidan-an ang mga lumolupyo sa baybayon sa maong mga probinsya nga mangliki o molikay sa dagat ug mobalhin sa mas taas ug luwas nga lugar, Nagpahimangno usab ang PHIVOLCS sa posibilidad sa mga kadaot ug sunod nga aftershocks human sa maong linog.
Sa laing bahin nanawagan si PHIVOLCS Director Teresito Bacolcol sa mga katawhan nga dili mawad-an sa pag-andam ug pagsabot sa sunod-sunod nga kalamidad, ilabi na kadtong nakasinati na og ginatawag nga “disaster fatigue.” Gipasabot usab sa opisyal nga wala’y koneksyon ang mga linog nga nahitabo sa Cebu, La Union, ug Davao tungod kay lain-lain kini og fault system. Giingon usab niya nga normal lang ang mga pag-uyog sa nasud tungod matod pa, kapin sa 30 ka linog ang maitala matag-adlaw.