Hingpit nang andam ang probinsya sa Bukidnon sa pag-host sa Northern Mindanao Regional Athletic Association Meet 2026 diin gilauman nga moabot sa 9,580 ka atleta, coaches ug officials gikan sa 11 ka delegasyon.
Pagahimoon ang maong kalihokan sa Bukidnon Sports and Cultural Complex sa Malaybalay City ug magsugod ang opisyal nga kompetisyon sa Marso 19, tuig 2026.
Matud pa, gi-adjust ang petsa gikan sa Marso 18 aron masiguro ang presensya sa keynote speaker nga si Miguel Zubiri. Bisan adunay 14 ka school divisions sa Northern Mindanao, gihimong 11 ka delegasyon ang magkompetensya tungod kay ang ubang dibisyon naghiusa ubos sa “One Asenso Misamis Occidental.”
Samtang nagpadayon ang pagpangandam, pipila ka mga atleta ang sayo nang miabot sa probinsya aron makaangay sa bugnaw nga klima, ug gipasiguro sa mga organizer nga andam na ang billeting quarters, pasilidad ug seguridad alang sa maong kalihokan.