Nakit-an na ang tanang pito (7) ka mga sakay sa helicopter nga nahagsa sa territorial waters sa Qatar niadtong niaging mga adlaw.
Sa pinakabag-o nga report gikan sa Ministry of Interior sa Qatar, narekober na ang katapusang lawas sa usa ka tawo nga gideklarang missing kaniadto, human ang pipila ka adlaw nga intensified search and rescue operations. Kini nagkompleto sa pito ka mga biktima diin unom niini ang unang narekober nga wala na’y kinabuhi human sa trahedya.
Kahinumduman nga ang maong helicopter nakasinati og technical failure o aberya sa makina samtang naglupad, hinungdan sa pagkahulog niini sa dagat. Giklaro na sa mga awtoridad nga walay kalambigitan sa bisan unsang pag-atake ang maong insidente.
Sa pagkakaron, nagpadayon pa ang lawom nga imbestigasyon aron masuta ang tinuod nga hinungdan sa technical failure ug aron mahibal-an ang pagkatawo sa mga biktima ingon man ang tag-iya sa maong aircraft.