Moabot na sa 62 ka tawo ang nakalas tungod sa grabe nga pag-ulan ug kaylap nga pagbaha didto sa Kenya.
Hapit na usa ka semana nga nakasinati og kusog nga ulan ang maong nasod, hinungdan sa pag-awas sa mga suba. Pipila usab ka mga dalan ang gipangsira human nadaot ang mga tulay sa Nairobi.
Nagpagula og pasidaan ang interior ministry nga duna pay masinati nga grabeng pag-ulan ug pagbaha sa mosunod nga mga adlaw. Tungod niini, gitambagan ang mga residente nga mobakwit dayon sa mas luwas nga mga dapit.
Nisaad usab si Kenya President William Ruto nga naghimo na og pamaagi ang mga otoridad aron maluwas ug matabangan ang mga apektadong residente.
Dili lang ang Kenya ang nakasinati niini, tungod kay bisan ang nasod sa Ethiopia gihapak usab sa pagbaha ug mga landslide nga nikalas na og kapin sa 100 ka kinabuhi.