Miabot na sa nasod ang 61 ka stranded Overseas Filipino Workers (OFWs) gikan sa Dubai, United Arab Emirates niadtong Domingo sa Ninoy Aquino International Airport (NAIA) Terminal 3, sumala sa Department of Migrant Workers.
Matod sa DMW, sakay ang mga repatriated OFWs sa Emirates flight EK334, ug lakip sa miabot ang tulo ka menor de edad.
Gihatagan dayon sila og pinansyal nga tabang ug transportasyon aron makabalik sa ilang mga probinsya.
Nag-andam usab ang gobyerno og temporaryong kapuy-an, lakip ang psychosocial ug medical assistance alang sa mga OFWs nga gipapauli sa nasod.
Samtang, niadtong Sabado miabot usab sa Pilipinas ang 81 ka stranded OFWs gikan sa Middle East taliwala sa padayon nga tensyon sa maong rehiyon.
Padayon usab ang gobyerno sa pakigkonekta sa mga Pilipino nga anaa sa ubang nasod aron masiguro ang ilang kaluwasan ug matabangan ang mga gustong mobalik sa Pilipinas.