Gibalos og air strikes ang Israel sa Houthis sa Yemen human sila mipabuto og missiles sa maong nasud.
Gibomba sa Israel ang kapital sa Yemen nga Sanaa isip tubag sa pagpabuto og mga misil sa Houthi rebels padulong sa ilang teritoryo.
Matud sa tigdumala sa Houthi Health Ministry, unom ang namatay ug 86 ang samaran tungod sa maong air strike sa Israel.
Ang maong mga pagpabomba kini ang bag-ohay nga pag-atake sa kapin usa ka tuig nga binalusay tali sa Israel ug sa grupo sa mga militante nga Houthis sa Yemen, nga may kalambigitan sa kasamtangang giyera sa Gaza.
Matud sa Israeli Defense Forces (IDF), ilang target ang military compound nga nahimutang ang presidential palace, duha ka planta sa kuryente, ug usa ka lugar nga gitiguman og lana.
Gipasabot sa militar sa Israel nga ilang gihimo ang maong strike isip tubag sa sunod-sunod nga pag-atake sa grupo sa Houthis batok sa estado sa Israel ug sa ilang mga sibilyan.
Ang mga pag-atake naglakip sa pagpabuto og surface-to-surface missiles ug mga drone o unmanned aerial vehicles (UAVs) nga gidala padulong sa teritoryo sa Israel sa milabay’ng mga adlaw.
Gikumpirma sa mga Houthis niadtong milabay’ng semana nga mipabuto sila og ballistic missiles padulong sa Israel isip ilang paambit nga suporta sa mga Palestino sa Gaza.
Sumala sa opisyal sa Israeli Air Force, ang maong mga missile posible adunay mga sub-munitions nga gidisenyo nga sa pagtugpa niini sa target mubuto na kini .
Kini ang unang higayon nga gigamit sa Houthis ang ingon nga klase sa missile gikan sa Yemen.
Matud pa, ang sinugdan sa pagpangatake sa Houthis tungod kini sa mga barko nga molabay sa Red Sea, og ang maong lakang usa ka paghatag og simpatiya sa ilang kaalyado nga Hamas sa Gaza nga padayon ang pakigbangi batok sa Israel.