6 ka indibidwal nga nalambigit sa pagpangdunggab anaa sa kritikal nga kondisyon human sa insidente sa South Poblacion, Maramag, Bukidnon. Sa pakighinabi sa Bombo Radyo Malaybalay, gipadayag ni PCpt. Sheila Joy P. Jangad, tigpamaba sa Bukidnon Police Provincial Office, nga nahitabo ang insidente pasado alas 11:30 sa gabii sa milabayng adlaw.
Sumala sa inisyal nga imbestigasyon, unom ka indibidwal ang naangol, lakip ang usa ka lalaki nga taga Balingasag nga nadunggaban sa dughan ug milapos sa baga, samtang ang iyang kauban nadunggaban kini sa likod.
Apil usab sa mga biktima ang duha ka magsoon nga taga Camp Base, diin ang usa naigo sa ulo ug kamot, ug ang usa adunay lima ka samad sa likod. Usa ka menor-de-edad ang naangol usab human gisumbag. Ang tanang biktima karon anaa sa balay tambalanan ug gipahimutang sa kritikal nga kondisyon.
Gipasabot ni Jangad nga ang panagbangi nagsugod sa usa ka panagtagay sa tindahan, diin nag-away ang duha ka grupo human nagkagubot diin nahitabo na pagnilbaya og botelya ug bato na mipaingon sa pagpangdunggab.
Usa sa mga suspetsado, mao ang usa ka lalaki nga nagsul-ob og black T-shirt, na midunggab sa usa ka magsoon na nakatala sa lima ka dinunggaban. Ang suspek nadakpan 25 metros gikan sa crime scene ug nakit-an nga nagkadugo samtang nagdala og duha ka kutsilyo nga lima ka pulgada.
Sa pagkakaron, ang suspetsado anaa na sa Maramag Police Station, samtang ang tanan nga nalambigit anaa sa balay tambalanan. Nagpadayon ang kapulisan sa imbestigasyon ug naghulat kini sa kinsa ang magpasaka og kaso aron mapadayon ang pormal nga proseso.