Lima ka mga sakop sa kapulisan ang nakabsan sa kinabuhi samtang tulo ang samaran human gi-ambush sa wala pa mailhing armadong grupo niadtong Sabado sa gabii, Marso 28, 2026.
Sumala sa report, nahitabo ang insidente takna alas-9:10 sa gabii sa Maguindanao Street, Barangay Mother Poblacion, samtang pabalik na sa ilang kampo ang mga biktima gikan sa usa ka patrol operation.
Ang mga namatay giila nga sila si Patrolmen Kenneth Perocho, Al-Fatah Marohom, Amil Bangsa, Arsenal Sivih, ug Sayed Ridwan, kinsa pulos gideklarar nga Dead on Arrival pag-abot sa balay-tambalanan.
Samtang, sa pagkakaron padayon pang giatiman sa Integrated Provincial Health Office ang mga samaran nga sila si Police Lieutenant Alfred Gregory, Police Staff Sergeant Adam Kamarudin Kansi, ug Patrolman Abubakar Lauban human makaangkon og mga samad pinusilan.
Sa kasamtangan, nagpahigayon na og hot pursuit operation ang mga awtoridad aron paggukod sa mga suspisado nga daling miikyas human sa maong madugunong engkwentro.
Wala pa’y grupo nga miangkon sa responsibilidad sa maong pagpangatake samtang gihugtan na ang seguridad sa tibuok probinsya.