Naugdaw ang lima ka mga classroom sa New Nongnongan National High School sa lungsod sa Don Carlos human kini gilamoy sa usa ka dakong sunog nga gituohang naggikan sa electrical fault o mipalyar nga suga sulod sa usa sa mga classroom.
Sa eksklusibong pakighinabi sa Bombo Radyo Malaybalay kang SFO1 Emmanuel M. Arcilla, Chief Investigation and Intelligence Division sa Bureau of Fire Protection–Bukidnon, miluwat kini nga base sa inisyal nga imbestigasyon, mukabat sa kapin P75,000 ang natala nga kantidad sa damyos sa maong insidente.
Matud ni SFO1 Arcilla, usa sa mga hinungdan sa paspas nga pagkaylap sa kalayo mao ang gilay-on sa eskwelahan gikan sa estasyon sa BFP, hinungdan nga pag-abot sa mga bombero, halos naugdaw na ang lima ka mga classroom.
Dugang pa niini, karaan na ang mga tulonghaan ug kadaghanan niini ginama sa kahoy, nga nakapadugang sa kusog ug kapaspas sa pagdilaab sa sunog.
Giklaro usab sa BFP nga walay natalang nasamdan sa maong insidente gumikan nahitabo kini kagahapon, Disyembre 15, 2025, alas 6:05 sa gabii.
Kahinumdoman nga kaniadto usab miaging adlaw gilamoy usab sa sunog ang Kalilangan Baptist Christian Academy nga adunay 16 ka mga classroom nga gibanabanang adunay P397,500 nga kantidad sa kadaut sa estruktura ang natala.