Gibutyag ni Sec. Vince Dizon sa Department of Public Works and Highways (DPWH) nga 421 ka flood control projects sa tibuok nasud ang nasuta nga ghost projects human sa ilang gipahigayon nga initial inspection sa kapin 8,000 ka mga proyekto.
Ang maong inspeksyon gihimo sa milabayng mga semana uban sa pakigtambayayong sa Department of Economy, Planning, and Development (DEPDev), Philippine National Police (PNP), ug Armed Forces of the Philippines (AFP).
Ang mga proyekto gilista human walay aktuwal nga trabaho nga gihimo o estruktura nga natukod bisan pa man og adunay pondo nga gigahin. Nasuta nga ang maong ghost projects gikan sa nagkalainlaing bahin sa Luzon, Visayas ug Mindanao, apan kadaghanan niini nahimutang sa Luzon.
Apil sa mga nadiskubre nga proyekto mao ang gipondohan ug gikontrata sa pipila ka mga kontraktor sa gobyerno nga posibling magatubang sa kaso tungod sa ilang kalambigitan sa maong mga maanomalyang proyekto.
Kasamtangan nakipag-koordinar na ang DPWH sa Independent Commission for Infrastructure (ICI) aron mahatagan og tukmang aksyon ug imbestigasyon ang mga proyekto.Ang maong impormasyon gikatakdang gamiton isip ebidensya sa posibleng pagsang-at og kaso batok sa mga responsable.
Nagpadayon ang lakang sa gobyerno nga panalipdan ang pondo sa katawhan ug siguruhong transparent ang implementasyon sa mga imprastruktura nga proyekto sa nasud.