Nasikop ang upat (4) ka indibidwal nga nagpayuhot og iligal nga droga human sa usa ka drug buy-bust operation nga gikasa sa kapulisan sa Purok 5, Barangay 9, Malaybalay City, Bukidnon ning milabayng adlaw.
Ang mga dinakpan usa ka 30-anyos nga lalaki (watch-listed), usa ka 25-anyos nga lalaki, usa ka 21-anyos nga lalaki, ug usa ka 22-anyos nga babaye, diin tanan giila isip bag-ong mga drug suspect.
Nasakmit gikan kanila ang gituohang shabu nga adunay kinatibuk-ang gibug-aton nga 10.074 gramos nga nagkantidad og Php68,503.20, usa ka P500.00 bill, ug lain-laing drug paraphernalia.
Lakip usab sa mga nakuha ang usa ka .38 caliber revolver, lima (5) ka .38 cartridges, ug usa ka cellphone.
Giandam na ang mga kasong paglapas sa Article II, Sections 5 ug 11 sa RA 9165 ug RA 10591 nga ipasaka sa buhatan sa Provincial Prosecutor sa Malaybalay City.
Ang mga dinakpan ug ebidensiya gidala sa Malaybalay CPS alang sa hustong disposisyon, samtang ang mga nakumpiskang droga gidala sa Provincial Forensic Unit sa Malaybalay City alang sa qualitative ug quantitative examination, lakip na ang firearm ug ballistic examination.