Nasikop sa kapulisan ang duha ka babaye sa gihimong operasyon batok sa illegal online sabong sa Purok 4, Barangay Tankulan, Manolo Fortich, Bukidnon, niadtong Abril 4, 2026.
Gilusad ang maong operasyon human nakadawat og impormasyon ang kapulisan bahin sa pagpundok sa mga indibidwal nga naggamit og laptops ug electronic devices aron modawat og pusta sa online sabong nga walay legal nga permit.
Ang mga dinakpan giila nga nagpangidaron og 30 ug 39 anyos. Nakuha gikan kanila ang nagkadaiyang ebidensya lakip ang duha ka laptops, mga printer, scanners, bet slips, ug bet money nga nagkantidad og ₱10,550.
Sa pagkakaron, anaa na sa kustodiya sa Manolo Fortich MPS ang mga suspek kinsa mag-atubang og kasong paglapas sa Presidential Decree 1602 (Illegal Gambling). Nagpasidaan ang Bukidnon Police Provincial Office nga mas pahugtan pa ang ilang kampanya batok sa tanang matang sa illegal nga sugal sa probinsya.