Mipadayag sa ilang mga mulo ang mga drayber sa transport group sa probinsiya sa Bukidnon ug tibuok rehiyon.
Matud ni Joel Gabatan, Regional Coordinator sa National Confederation of Transportworkers Union (NCTU) Region 10 nga dunay nangayo sa 3 pesos nga increase ug nadungog matud pa usab niini nga duna usab laing grupo ang mangayo sa mas taas pang presyo gumikan sa pag-usbaw sa presyo sa produktong petrolyo.
Dugang ni Gabatan, nga kini nga pagtaas sa presyo dunay dako nga epekto sa panginabuhian sa mga drayber.
Nangandam usab ang ahensya nga magpatawag og panagtigom aron mas mahisgutan ang mga posibleng lakang.
Miluwat usab si Gabatan nga gikatakda silang magpahigayon og rally aron matud pa nga hingpit mapaminawan ang ilang mga mulo.
Taliwala sa dakong hagit sa pagtaas sa presyo, miluwat usab si Gabatan nga duna usab fuel subsidy isip ayuda gikan sa gobyerno alang sa mga sektor nga labing apektado sa pagsaka sa presyo sa gasolina.
Apan, gibutyag ni Gabatan nga dunay mga drayber ug operator nga wala matagai bisan mipasa na kini og dokumento.
Gisaysay ni Gabtan, nga ang bahin sa maong fuel subsidy anaa sa 30% alang sa driver, 30% sa operator, 40% sa kooperatiba. Nangandam usab ang NCTU nga matagaan og kasulbaran ang maong problema.