Nagpahigayon og mass wedding ceremony ang 403rd Infantry “Peacemaker” Brigade sa Camp Osito D Bahian niadtong Sabado, Marso 28, 2026, diin 15 ka “friends rescued” ang nagpakasal sulod sa simbahan sa kampo.
Ang mga magtiayon, nga kanhi mga miyembro sa New People’s Army, mibati og dakong kalipay human matuman ang ilang dugay nang pangandoy nga mahimong legal ang ilang panag-ipon.
Sumala sa kasundalohan, ang kalihokan kabahin sa padayon nga programa sa gobyerno sa pagtabang ug reintegrasyon sa mga nagbalik-loob sa gobyerno.
Gipangunahan ang maong inisyatiba ni Seigfred C. Tubalado uban sa mga stakeholders sa brigada aron suportahan ang kaayohan sa mga magtiayon.
Atol sa selebrasyon nagpaambit ang opisyal og usa ka mahinungdanong mensahe sa mga bag-ong magtiayon nga misulod sa kinabuhi sa kaminyuan.