15 ka opisyal, kasohan sa Ombudsman tungod sa anomalya sa flood control projects

Gilauman nga magpasaka ug kaso sa Sandiganbayan ang Office of the Ombudsman sa dili pa moabot ang Nobyembre 25 batok sa mga opisyal nga nalambigit sa anomalya sa mga flood control projects sa nasud.

Sumala ni Ombudsman Jesus Crispin Remulla, anaa sa 14 hangtod 15 ka mga opisyal sa gobyerno ang posibleng kasuhan, diin kasagaran kanila nalambigit sa mga ghost projects sa Bulacan ug Mindoro.

Giklaro ni Remulla nga posibleng masang-at sa ilang kaso ang graft tungod sa mga iregularidad sa pagpatuman sa maong mga proyekto.

Kasamtangan, padayon pa ang imbestigasyon ug pagtigom sa mga ebidensya aron mapalig-on ang kaso batok sa mga opisyal nga nalambigit sa maong kalihokan.