12 oras nga mawala ang linya sa kuryente karong adlaw Sabado nga makaapekto sa mga kalungsuran ug mga syudad sa Valencia ug Malaybalay.Gipasabot ni Bukidnon Second Electric Cooperative (BUSECO) General Manager Christopher A. Dulfo nga ang tumong sa 12-oras nga power interruption karong umaabot nga Sabado, alang sa maintenance ug upgrading sa substation sa National Grid Corporation of the Philippines (NGCP) nga nahimutang sa Maramag.
Sumala ni Dulfo, ang brownout magsugod sa alas 6 sa buntag hangtod alas 6 sa gabii ug kini kabahin sa giaprobahan nga lihok sa NGCP nga gipahibalo pinaagi sa opisyal nga sulat sa ilang buhatan.Giklaro sa opisyal nga una kining giplano nga buhaton sa miaging semanang eleksyon, apan tungod sa hangyo sa katawhan ug mga stakeholders, gi-isbog kini aron dili makaapekto sa pagboto ug pag-ihap sa mga balota.
Ang maong aktibidad tumong sa pagpalig-on sa serbisyo sa kuryente ug pagsiguro nga lig-on ang transmission system sa Bukidnon ug kasikbit nga lugar. Gihangyo sa BUSECO ang publiko nga andamon ang ilang mga gamit ug limitahan ang paggamit sa kuryente sa maong petsa.