Gibutyag ni Bise Presidente Sara Duterte nga gitugotan sa International Criminal Court (ICC) nga manumpa si kanhi Presidente Rodrigo Duterte human kini midaog pagka-mayor sa Davao City sa bag-ohay lang nahuman nga eleksyon.
Sumala ni VP Sara, gihan-ay na sa ilang mga abogado sa ICC ug sa Pilipinas ang proseso sa pagpanumpa.
Matud pa, gihatagan sila og deadline sa ICC hangtod sa udto sa Hunyo 30 aron ipahigayon ang maong pagpanumpa. Kung makuha na nila ang proclamation papers sa kanhi presidente, mamahimo na kini nga manumpa isip bag-ong alkalde sa Davao City.
Sa pagkakaron wala pa opisyal nga gipahayag sa Bise Presidente kung unsaon paghimo sa sa iyang amahan isip mayor samtang nagpadayon ang kaso niini sa gawas sa nasud.
Sa pikas bahin, mitambong sila VP Sara Duterte, Cong. Paolo Duterte, Cong-elect Omar Duterte, Councilor-elect Rigo Duterte ug uban pa kauban ang mga nakadaog nga kandidato ilawom sa Hugpong sa Tawong Lungsod Party sa Davao City.
Ang maong misa gipahigayon isip pagpakita og pasalamat human nga midominar ang pamilyang Duterte sa milabayng bugnong lugaynon diin gipahigayon kini sa Carmelite Church, Lanang, Davao City.