Pormal nga migradwar ang 100 ka pamilya nga benepisyaryo sa Pantawid Pamilyang Pilipino Program (4Ps) atol sa usa ka seremonyang gihimo ubos sa programa sa “Pugay Tagumpay” sa syudad sa Malaybalay ning tuiga.
Ang aktibidad gipasiugdahan sa Department of Social Welfare and Development (DSWD), kauban ang mga lokal nga panggamhanan ug nasyonal nga ahensya, isip pasidungog sa kalampusan sa mga pamilya nga malampusong nakagawas sa 4Ps human sa tuig-tuig nga partisipasyon sa programa.
Sumala sa DSWD, ang graduation usa ka milestone nga gipasabot nga ang pamilya wala nay eligible members o nakab-ot na ang katakos sa kaugalingong panginabuhi, sama sa pagkompleto sa high school sa pinakabata nga anak, pagtungtong sa edad nga 19, o human sa pito ka tuig nga pagka-apil sa programa.
Gipasabot ni DSWD Assistant Secretary Marites M. Maristela nga ang Pugay Tagumpay dili lang usa ka pasidungog apan pagsaulog sa kakugi, determinasyon, ug kabag-ohan sa kinabuhi sa mga benepisyaryo.
Giingon usab nga ang mga pamilya nga mi-graduate, ilalom sa pagdumala sa lokal nga gobyerno sa Malaybalay, ilahang mabatonan ang suporta padayon pinaagi sa livelihood opportunities, skills training, ug referral services aron malikayan ang pagbalik sa kalisod.
Niadtong seremonya, gihimo usab ang turnover sa case folders ngadto sa LGU Malaybalay, nga gidumala ni Mayor Jay Warren R. Pabillaran, isip simbolo sa padayon nga panag-uban sa LGU ug DSWD alang sa kahimtang sa mga exited households.
Nagpasalig si mayor Pabillaran nga buhaton ang tanan aron suportahan ang maong programa.
Gipasabot sa mayor nga ang kwarta gikan sa goberno angay gayud idalit sa katawhan gumikan kwarta man kini gikan sa buhis sa mga tawo busa walay anagay kabalak-an gumikan siya mismo ang mag-una sa tukmang pagduma sa mga programa sa syudad.