Mukabat ₱187 milyon ang economic loss matag adlaw sa Northern Mindanao human masirado ang Bukidnon-Davao o BuDa Road tungod sa pagdahili sa yuta sa Sitio Kipolot, Brgy. Palacapao, Quezon, Bukidnon.
Sa eksklusibong pakighinabi sa Bombo Radyo kay Ray Talimio Jr., former Oro Chamber sa Economic Development Committee Region 10, ₱132 milyon ang kada adlaw nga dugang gasto sa travel cost, fuel ug logistical loss. Lakip usab niini ang ₱55 milyon kada adlaw nga kadaot sa mga high value crops tungod sa delay sa transportasyon.
Gipasabot usab ni Talimio nga importante ang BuDa Road kay mao kini ang nagkonektar sa Northern Mindanao ngadto sa Davao Region ug uban pang syudad. Giawhag ni Talimio ang tanang Mindanaoan leaders nga magkahiusa aron mapadali ang paghuman sa dalan.
Saysay pa niini nga gitinguha sa DPWH ug lokal nga pangagamhanan sa Bukidnon nga maablihan ang detour road sulod sa 2 hangtod 3 ka bulan apan dakong hagit kini tungod sa panginahanglan sa dakong pondo ug trabaho nga 24/7 ang operasyon.
Dugang pa ni Talimio, kinahanglan nga makighiusa ang mga mambabalaod sa Mindanao sa pagduso sa mas taas nga budget alang sa rehiyon sa 2026 National Budget kay bisan gamay nga porsyento nga madugang niini mahimong pipila pa ka bilyones ug daghang proyekto ang mapondohan.