Kapin ₱65 milyon nga kadaot ang natala human sa grabe nga pagbaha nga miigo sa Valencia City niadtong Septiyembre 17, diin liboan ang naapektuhan ug tulo gihapon ka tawo ang pabiling missing.
Gideploy ang mga sundalo, mga personahe sa Coast Guard nga adunay expertise sa water search operations, K9 units, ug mga responder gikan sa Cagayan de Oro City, Probinsya sa Bukidnon, ug lokal nga disaster office sa lain-laing ahensya nga apil na ang Pulangui Dam Reservoir sa Panadtalan, Maramag.
Didto narekober ang patay’ng lawas sa upat ka tuig nga si Deejay Ark Taña-Viña, nga mao ang ikalima nga kumpirmadong patay. Samtang, nagpabilin pa gihapong missing sila si Johnny Borbon, 63; Dina Consolacion, 48; ug duha ka tuig nga si Andrea Vistal.
Sumala sa Valencia CDRRMO spokesman nga si Jovenone Abriol Ellacone, padayon ang clearing sa debris sa grabe nga naapektuhang mga lugar sa Purok 20 ug 13 sa Barangay Poblacion. Gikataho usab niini nga niabot na sa ₱65 milyones ang kadaot nga naglangkob sa agrikultura, kahayupan, mga panimalay, ug imprastruktura sa walo ka barangay.
Nisaka na usab ang gidaghanon sa mga apektadong pamilya ngadto sa 2,725 o katugbag sa 4,234 ka indibidwal. Daghan sa ilang mga panimalay nga nahurot ug dala sa kusog nga baha ang nagpabilin sa city gym nga gigamit pa hangtod karon isip evacuation center.