Giablihan ni Department of Public Works and Highways (DPWH) Secretary Vince Dizon kagahapong adlawa ang detour road sa Palacapao, lungsod sa Quezon, Bukidnon human sa personal nga inspeksiyon sa proyekto, aron mabalik ang normal nga dagan sa trapiko ug mapugngan ang gibanabanang ₱40 milyones nga adlaw-adlaw nga pagkalugi sa ekonomiya sa lalawigan.
Matod ni Dizon, bisan wala pa hingpit nga nahuman ang dalan, napugos ang DPWH sa pag-abli niini tungod kay luwas na ug maagian, ug aron dili na modako pa ang kada adlaw nga lugi sa negosyo ug transportasyon sa probinsya.
Gipahibalo nga ang proyekto nahuman sulod lamang sa duha ka bulan ug tunga, nga mas paspas kumpara sa unang estima nga duha ka tuig, tungod sa tinabangay nga paningkamot sa DPWH, lokal nga kagamhanan, ug ni Senator Migz Zubiri.
Dugang pa sa kalihim, magsugod sa Biyernes ang asphalt overlay sa dalan samtang magpabiling abli kini sa publiko uban sa traffic management.
Gipatuman usab ang bag-ong drainage system ug slope protection aron malikayan ang pagbalik sa kadaut, ug gipahibalo nga ang detour road mao na ang itudlong permanenteng dalan tungod sa delikadong seksiyon sa kalsada..