Kinahanglang mobalik sa Pilipinas si kanhi Ako Bicol Partylist Rep. Zaldy Co kon seryoso kini sa iyang tinguha nga motestigo sa giatubang nga impeachment complaint ni Pangulong Ferdinand “Bongbong” Marcos Jr.
Kini ang gipahayag ni House Committee on Justice Chairperson ug Batangas Rep. Gerville Luistro, diin iyang gipasabot nga bisan kinsa adunay katungod nga motestigo, apan kinahanglan kining mosunod sa mga balaod sa komite.
Gipasabut ni Luistro nga ang usa ka testigo kinahanglang personal nga moatubang ug manumpa (under oath) sa dili pa magsugod ang pagdungog. Sumala sa House rules, dili itugot ang paghatag og testimoniya pinaagi sa teleconferencing o bisan unsang digital nga paagi.
Kini nga pamahayag migawas human gibutyag ni kanhi Congressman Mike Defensor nga andam si Co nga mobarog isip witness aron palig-onon ang reklamo batok sa Pangulo, apan gitinguha niini nga himoon ang pagtestigo pinaagi lamang sa Zoom sanglit anaa pa kini sa gawas sa nasud.