Gipadayag ni Atty. Manuelito Luna, complainant sa impeachment batok kang Presidente Ferdinand Marcos Jr., nga andam motestigo si kanhi Ako Bicol Rep. Elizaldy “Zaldy” Co pinaagi sa video conferencing kon dawaton sa Kamara ang reklamo, aron mapamatudan ang giingong anomalya sa flood control projects ug uban pang kaso sa korapsyon.
Matud ni Luna, gipadayag kini ni co-complainant Mike Defensor ug giingon nga legal ug madawat sa balaod ang video conferencing isip pamaagi sa testimonya. Sumala niini, importante ug halapad ang posibleng testimonya ni Co, ilabi na sa paghisgot sa giingong pagkalambigit sa Presidente sa mga iregularidad.
Nagpasabot usab si Luna nga andam silang mopasaka pag-usab sa impeachment complaint sa Kamara human wala kini madawat niadtong Enero 22 tungod sa pagkawala sa opisina sa Secretary General, ug gihagit niya ang liderato sa Kamara nga sundon ang proseso ug dawaton ang reklamo.