Nagpasidaan ang mga watchdog groups ngadto sa Malacañang pipila ka adlaw sa dili pa pirmahan ni Presidente Ferdinand Marcos Jr. ang 2026 national budget.
Matud pa sa People’s Budget Coalition ug Roundtable for Inclusive Development, mukabat sa kapin P633 bilyon gikan sa kinatibuk-ang P6.793 trilyon nga budget ang nameligrong magamit sa korapsyon ug patronage politics kon dili kini i-veto sa Presidente.
Sa ilang suwat ngadto sa Palasyo, gi-detalye sa mga grupo ang tulo ka matang sa “pork” nga anaa sa gisugyot nga budget sa Hard Pork (P180 Bilyon) nga gilangkuban kini sa mga proyekto sa imprastraktura sama sa mga kalsada ug flood control.
Matod sa grupo, kini nga mga proyekto kulang sa klarong plano ug dali ra madoble ang pondo o mapatungan ang presyo.Soft Pork (P210 Bilyon) Kini ang pondo alang sa ayuda nga giingong gigamit sa mga politiko. Gusto sa grupo nga ipaagi kini sa mas estrikto nga mga lagda ug konsultasyon sa mga eksperto sa social protection ug Shadow Pork (P243 Bilyon) gitawag kini sa grupo nga “unprogrammed appropriations” nga kinahanglan gyud nga i-veto tungod sa kakuwang sa transparency ug dili igo nga pagsusi sa Kongreso.
Tungod niini, gisugyot sa mga grupo ang pagpalig-on sa citizen monitoring pinaagi sa inisyatibang “Bantay Bisto Proyekto” kauban ang DPWH.
Tumong niini nga himoong bukas sa publiko ang mga dokumento, gasto ug lokasyon sa mga proyekto aron masiguro nga dili mabulsa ang kwarta sa katawhan.
Nanawagan ang maong mga organisasyon sa gobyerno nga hatagan og bili ang transparency ug siguroon nga ang pondo sa nasod mabutang sa mga programa nga tinuod nga makatabang sa mga kabus.