Gikumpirma ni House Committee on Justice Chairperson Rep. Gerville Luistro nga mahimo nang ipatawag si Vice President Sara Duterte sa higayon nga magsugod na ang pormal nga hearing proper sa impeachment case niini.
Sa nahitabong deliberasyon sa House Committee on Justice karung adlawa, gikuwestyon si Sorsogon 2nd District Representative Manuel Fortes Jr. kon gikinahanglan na ba nga imbitahon ang Bise Presidente sa kasamtangang pagdungog.
Matod pa ni Rep. Luistro diin iyang gipasabot nga ang saktong panahon alang sa pakighinabi kang VP Sara, kauban ang mga complainants, mahitabo kon ang dagan sa komite mosulod na sa gitawag nga hearing proper.
Mahitabo lamang kini kon pormal nang nadesisyonan sa komite nga adunay “sufficient grounds” o igong basehan ang duha ka managlahing reklamo batok sa Bise Presidente.
Gikuwestiyon usab ni Rep. Fortes kon gitugot ba sa mga lagda sa komite nga ang mga abogado ni VP Sara maoy motubag imbes nga ang Bise Presidente, sama sa gihimo sa gipanumpaan nga Answer Ad Cautelam.
Apan giklaro ni Rep. Luistro nga limitado lamang ang papel sa mga abogado ug dili mamahimong puli sa direktang pagtubag sa mga akusasyon.