Nagpahimangno si Vice President Sara Duterte sa publiko kabahin sa hustong pagsunod sa balaod sa trapiko aron malikayan ang bisan unsang matang sa aksidente sa kalsada. Gibuhat sa bise ang panawagan human sa pagsaka sa ihap sa mga aksidente sa kalsada nga naglakip sa mga sakyanan , ilabi na kadtong nahitabo sa SCTEX ug NAIA.
Ang maong mensahe kay kabahin sa selebrasyon sa Land Transportation Safety Month, diin giingon ni VP Sara nga kinahanglan nga magkahiusa ang mga motorista, pribadong sektor, ug gobyerno aron masiguro ang kaluwasan sa kadalanan. Matod ni VP Sara, ang kaluwasan sa kalsada dili lang trabaho sa mga traffic enforcers.
Nanawagan sab siya sa mga pribadong sektor nga siguruhon nga ang ilang mga drayber anaa sa maayong kondisyon ug makasalmot sa hugot nga training ug seminar. Base sa datos, kapin 11,000 ka mga Pilipino ang namatay niadtong tuig 2021 tungod sa mga aksidente sa kalsada. Kadaghanan sa mga biktima kay mga pedestrian, motorista, siklista, ug mga pasahero sa traysikol nga kasagaran nag-edad og 15-19 anyos.