Gikagubtan karun online ang usa ka vlogger sa Guangdong human misikat ang video niini nga nagpakita sa iyang proseso sa pag-extract og 191.73 gramos nga bulawan gikan sa mga daang SIM cards ug uban pang electronic waste.
Sa video, iyang gipakita ang komplikado nga chemical processes sama sa paggamit og kusog nga asido ug electrolytic reduction aron “matunaw” ang mga scrap ug makuha ang bulawan.
Giingon nga ang nakuha nga bulawan nagkantidad og kapin 120,000 yuan o mga P950,000 kung i-convert.
Tungod sa iyang demonstrasyon, daghang netizens ang naengganyo ug naghunahuna nga sayon ra diay mahimong dato pinaagi sa gitawag niyang “SIM alchemy.”
Apan mipagawas dayon og pahimangno ang mga eksperto nga too good to be true ang maong claim kung gikan lamang sa ordinaryong SIM cards.
Sa tinuod, ang usa ka SIM card adunay mga 0.47 milligrams nga gold content, busa kinahanglan og halos 400,000 ka piraso aron maabot ang kadaghan sa bulawan nga iyang gipakita.
Tungod niini, gidudahan sa kadaghanan ang tinuod nga gigikanan sa bulawan sa video. Sa ulahi, miangkon usab ang vlogger nga migamit siya og gold-plated computer chips gikan sa mga electronic components sama sa computer, cellphone, ug servers, nga adunay nipis nga layer sa bulawan ug mas dako og gold content tandi sa SIM cards.