Gipaambit sa publiko sa French-Filipino content creator ug athlete nga si Emilienne Vigier, ang kahimtang sa relasyon niini sa aktor nga si Joshua Garcia, nga gihulagway niini nga lig-on, mature, ug gipanalipdan pinaagi sa paghatag bili sa pribasiya.
Matud ni Vigier, dul-an na tulo ka tuig silang nagkuyog apan gipili niini nga ipahilayo sa mata sa publiko ang relasyon aron malikayan ang dili angay nga pagsaway ug espekulasyon.
Sigon niini, nga dako ang tabang sa kahilom ug limitadong pagpaambit sa personal nga detalye aron mapreserbar ang pagsinabtanay ug kalinaw sa panag-uban.
Dugang pa sa paghulagway sa ilang relasyon nga luwas ug puno sa pagsalig, diin nagasuportaay kini dili lamang isip mag-uyab apan lakip usab isip “best friend”.
Gipadayag usab niini, nga wala kini nabalaka sa mga kauban ni Joshua sa mga proyekto hilabi na ang mga artistang babaye, tungod aduna kini’y lawom nga pagsabot ug pagtahod sa propesyon niini.