Misaka ngadto sa ₱17.71 trilyon ang kinatibuk-ang utang sa Pilipinas sa pagtapos sa tuig 2025. Kini base sa ulahing report gikan sa Bureau of the Treasury (BTr) karong Martes, Pebrero 3.
Sumala sa maong ahensya, ang maong kantidad mas taas og 10.32 porsyento kon itandi sa ₱16.05 trilyon nga utang niadtong tuig 2024. Giingong nag-unang rason sa pagsaka sa utang mao ang dugang pagpangutang sa gobyerno aron pondohan ang mga development programs, dungan usab sa paghuyang sa kantidad sa piso batok sa dolyar.
Sa kinatibuk-ang utang, ang domestic debt o utang sa sulod sa nasud moabot sa ₱12.12 trilyon, samtang ang foreign debt o utang sa gawas moabot sa ₱5.59 trilyon.
Bisan pa sa nagkadako nga utang, gipasalig sa mga economic managers sa nasud nga wala kini angay ikabalaka samtang mas paspas ang pagtubo sa ekonomiya kaysa sa utang. Apan nabantayan nga nahimong mas hinay ang pagtubo sa ekonomiya sa miaging tuig tungod sa mga katalagman ug ang paghinay sa gasto sa gobyerno nunot sa pipila ka mga isyu sa korapsyon.