Gitubag sa Malacañang ang pamahayag ni Bise Presidente Sara Duterte nga nasuko matud pa ang mga Pilipino sa pagdakop ug pagdala kang kanhi Presidente Rodrigo Duterte sa The Hague.
Sa interbyu sa Davao City, miluwat si VP Sara Duterte, nga daghan sa mga Pilipino ang nagpabiling nasuko sa nahitabo ug kini nga kasuko dili mawala hangtod nga dili mahibalik ang kanhi Presidente sa Pilipinas.
Matud ni Palace Press Officer Claire Castro, mahimong ingon niini ang panglantaw sa Bise Presidente tungod nag-atubang ang amahan og kasong crimes against humanity sa International Criminal Court kon ICC.
Giinsister ni Castro, nga dili tanang mga Pilipino ang adunay susama nga pagbati sa maong isyu.
Dugang pa niini, nga aduna usab mga sektor sa katilingban nga padayong nangita og hustisya alang sa mga biktima sa giingong extrajudicial killings kon EJK nga nalambigit sa war on drugs sa miaging administrasyon.
Sumala pa sa Malacañang, nga ang mga kaso nga gipasaka batok sa kanhi Presidente sa International Criminal Court naggumikan usab sa mga reklamo nga gisang-at sa pipila ka mga Pilipino nga nagtuo nga wala makuha ang hustisya nga gipangayo sa sulod sa nasud.