Usa ka turista angol, human gipusil sa wala mailhing suspek sa Talakag Bukidnon!

Landing sa balay tambalan ang usa ka 38-anyos nga lalaki human kini gipusil samtang naglingaw-lingaw sa Abaga ta Bayug Falls, Sitio Dagunalan, Barangay Lantud lungsod sa Talakag kagahapong adlawa takna alas-8:30 sa buntag.

Sumala sa report kalit lamang nakadungog og buto sa armas ang tour guide samtang nagkuhag hulagway sa mga turista, hinungdan nga nagkatibuwaag kini sa pagdagan.

Pagbalik sa tour guide, nakita na lamang ang biktima nga nagbuy-od ug aduna nay mga samad pinusilan sa wala nga bahin sa nawong, liog, dughan, ug tiyan. Gidala dayon ang biktima sa Bukidnon Provincial Hospital apan gibalhin ra usab sa Northern Mindanao Medical Center (NMMC) sa Cagayan de Oro City alang sa mas dako nga operasyon.

Sa inisyal nga pakisusi, gituohang shotgun ang gigamit nga armas base sa mga samad sa biktima. Gituohan usab nga ang bala naggikan sa pikas bahin sa suba nga adunay gilay-on nga 20 hangtod 30 metros gikan sa nahimutangan sa mga turista.

Sa pagkakaron, wala pay nailhan nga suspek sanglit wala kini makit-i sa mga saksi sa palibot. Padayon usab ang gihimong manhunt ug follow-up investigation sa kapulisan aron masayran ang motibo sa maong pagpamusil ug madakpan ang responsable sa krimen.