Usa ka panimalay naugdaw sa may Brgy. Can-ayan ning syudad sa Malaybalay

Naugdaw ang usa ka panimalay human gilamoy sa dakong kalayo nga nahimutang sa Purok-3B, Barangay Can-ayan, Malaybalay City pasado alas 8:52 sa buntag, Pebrero 18, 2026.

Gikataho nga ang panimalay gipanag-iyahan sa usa ka pastor. Dugang pa kini gama sa light materials maong dali kining gilamoy sa kalayo.

Matud sa tag-iya nga si Jorge Asotique, nagtuo siya nga ang nabilin nga nag-aningas nga kahoy nga gigamit sa pagluto sa iyang anak ang gitudlong posibleng hinungdan sa sunog.

Gibana-banaang mokabat sa P7,500 ang kantidad sa damyos sa maong insidente, ug opisyal kining gideklarang fire out pasado alas 9:00 sa buntag karong adlawa.

Sa pagkakaron, nanawagan og tabang ang tag-iya sa balay human maabo ang tanang nilang gamit tungod sa sunog.