Gipili sa usa ka Overseas Filipino Worker (OFW) sa Abu Dhabi nga magpabilin sa maong nasud bisan pa sa nagkagrabeng tensiyon tali sa Estados Unidos, Israel, ug Iran.
Sa pakighinabi sa Bombo Radyo kang Nicole Bedtao, usa ka Bombo International News Correspondent sa Abu Dhabi, gipadayag niini ang kabalaka sa daghang mga kaubanan niini nga mas gipili sa pag-atubang sa peligro sa abroad kaysa sa kagutom sa Pilipinas.
Sumala kang Bedtao, mas hadlok ang pagpauli sa Pilipinas nga walay kasiguruhan nga makakitag panginabuhian, ilabi na nga adunay ginapa-eskwela nga mga anak.
Gipasiugda usab niya ang kakulang sa suporta gikan sa gobyerno.
Matud pa niya, ang ayuda nga kauban sa repatriation moabot lamang og napulo ka libong piso (₱10,000) ug usahay molungtad pa og pila ka bulan una makuha.
Gidugang pa ni Nicole nga nagpabiling mabalak-on ang sitwasyon sa Abu Dhabi human ang giingong pagpamomba sa airport ug sa usa ka pasilidad sa aseite nga niresulta na sa pagkamatay sa tulo ka indibidwal.
Sa kasamtangan, mikabat na usab sa 59 ka tawo ang gikatahong nangaangol tungod sa maong sunod-sunod nga pagpangatake sa lugar.