Nakabsan sa kinabuhi ang usa ka lalaki human gipusil patay sa usa ka insidente sa Sitio Migpait, Barangay Indulang, Talakag, Bukidnon.
Ang biktima usa ka 24 anyos, minyo ug sakop sa BPAT sa Barangay Besigan, Cagayan de Oro City, nga niadtong higayona mitambong sa likod-likod o kalihokan sa wala pa ang kasal sa iyang ig-agaw.
Sumala sa imbestigasyon sa Talakag Municipal Police Station, samtang nakig-estorya ang biktima sa iyang ig-agaw, kalit ug walay hinungdan nga gipusil siya sa suspek gamit ang .45 caliber nga pusil, diin miigo sa likod nga bahin nga lawas niini.
Human sa pagpamusil, dayong miikyas ang suspek padulong sa wala mailhing direksyon, samtang narekober sa crime scene ang usa ka empty cartridge sa .45 caliber nga pusil.
Gidala dayon ang biktima sa Bukidnon Provincial Hospital–Talakag apan gideklarar nga dead on arrival sa doktor tungod sa samad sa bala.
Misunod dayon ang hot pursuit operation sa kapulisan nga nagresulta sa pagkadakop sa suspek, nga karon anaa na sa kustodiya sa Talakag MPS ug giandam na alang sa inquest proceedings samtang ipailawom sa paraffin test ug ballistic examination ang mga ebidensya.