Nagpasidaan ang US Tsunami Warning System ning adlaw Miyerkules sa hulga sa tsunami human ang kusog nga 8.8 magnitude nga linog miigo sa Kamchatka Peninsula sa Russia.
Matud sa US Geological Survey (USGS), nagkanayon nga ang linog natala sa gilawmon nga 19.3 km o 12 ka milya ug miigo sa 125 ka kilometro silangan sa Petropavlovsk-Kamchatsky, usa ka coastal city sa Far Eastern Russia.
Gibanabana sa mga eksperto nga ang mga balod moabot sa mga bahin sa kabaybayonan sa Russia ug nasud sa Japan sulod sa tulo ka oras human sa linog.
Sa Japan, usa ka tsunami advisory ang gipagawas alang sa silangang bahin sa Hokkaido hangtod sa Wakayama, diin ang mga balod moabot sa 1 hangtod 3 metros ang kataas.
Samtang, ang gobyerno sa Japan, nagtukod og usa ka task force alang sa pagmonitor ug alang sa hinanaling aksyon.
Nagpagawas usab ang mga otoridad og tsunami watch alang sa mga isla sa Hawaii (US), Guam ug mga isla sa Micronesia ingon man sa mga baybayon sa US West Coast (California, Oregon, ug Washington), Aleutian Islands ug dagkong bahin sa Alaska.
Samtang sa Russia, usa ka tsunami nga 3 ngadto sa 4 metros ang gitas-on ang gilauman sa pipila ka bahin sa Kamchatka.
Sigon ni Kamchatka Governor Vladimir Solodov, kini na ang pinakakusog nga linog nga narekord sa rehiyon sa sulod sa pipila ka mga dekada.