Gikatakdang mubisita si US Secretary of State Marco Rubio sa Hungary ug Slovakia sa sunod semana, sumala sa report sa State Department. Ang maong lakang natigayon human gibutyag ni Presidente Donald Trump ang iyang suporta sa right-wing leader sa Hungary nga si Viktor Orban sa dili pa ang piniliay sa nasud karong Abril.
Matud pa sa State Department, makigtagbo si Rubio sa mga taas nga opisyal sa Hungary aron palig-onon ang bilateral ug rehiyonal nga interes.
Lakip sa hisgutan mao ang US-Hungary energy partnership ug ang kooperasyon alang sa kalinaw sa nagkalain-laing bahin sa kalibutan.Si Orban nailhan nga dunay suod nga relasyon kang Russian President Vladimir Putin ug sagad musupak sa mga inisyatibo sa European Union (EU) sa pagtabang sa Ukraine.
Bisan pa man sa paghulagway ni Trump kaniya isip usa ka “tinuod nga higala, fighter ug winner,” nag-atubang si Orban og malisod nga hagit alang sa iyang ikalimang termino karong Abril base sa mga pinakaulahing survey.
Gawas sa Hungary, mubisita usab si Rubio sa Slovakia aron makigtagbo kang Prime Minister Robert Fico, kinsa dunay susamang baruganan ni Trump.
Gikumpirma usab nga si Rubio ang muhulip kang Vice President JD Vance isip representante sa Estados Unidos sa ipahigayon nga Munich Security Conference karong tuiga.