Gikumpirma sa US Central Command (CENTCOM) nga unom (6) na ka mga sundalong Amerikano ang nakalas didto sa Kuwait tungod sa gihimong pagpangatake sa Iran.
Sa unang mga taho, tulo pa lamang ang gideklarar nga namatay, apan misaka ang gidaghanon sa dihang nakit-an ang patay’ng lawas sa duha pa ka sundalo sa gubot nga dapit (rubble) ug ang usa ka samaron nga nabugtoan na sa kinabuhi samtang gitambalan.
Matod sa mga opisyal sa militar, ang mga biktima naigo sa dihang usa ka missile ang nakalusot sa ilang air defense ug miigo sa usa ka tactical operations center sa Shuaiba Port sa Kuwait.
Kini ang unang mga kinabuhi nga nakalas gikan sa Estados Unidos sukad nagsugod ang nagkagrabe nga panagbangi tali sa US, Israel, ug Iran. Padayon pa ang gihimong pagsusi sa kinatibuk-ang danyos, samtang nagpabiling anaa sa “high alert” ang mga tropa sa maong rehiyon.