Gisugdan sa mga sakop sa US House Democrats ang usa ka pagsusi batok sa Department of Justice (DOJ) tungod sa pasangil nga tuyo niining gitago ang mga dokumento kalabotan sa “sexual abuse claims” batok kang Presidente Donald Trump.
Ang maong lakang gipasiugdahan sa House Oversight Committee human nadiskubre nga adunay kapin sa 50 ka panid ang nawala gikan sa napatik na nga Epstein Files.
Giingon nga ang maong mga nawala nga rekord adunay sulod nga mga summary gikan sa FBI interviews niadtong 2019, diin naghisgot kini sa usa ka babaye nga nag-akusar nga giabuso siya ni Trump niadtong tungatunga sa 1980s sa dihang siya nag-edad pa lamang og 13 hangtod 15 anyos.
Tungod niini, gipahayag ni Robert Garcia, usa ka opisyal sa komite, nga magpahigayon sila og “parallel investigation” aron mabawi ang maong mga dokumento gikan sa kagamhanan.
Samtang padayon nga gihimakak ni Trump ang maong mga pasangil, giklaro usab sa DOJ nga wala nila gipapas ang maong mga files.
Matod sa ahensya, temporaryo lamang kining gitangtang alang sa “redactions” aron panalipdan ang personal nga impormasyon sa biktima o giisip kini nga “privileged records”.