Gikatahong posibleng nawala ang unom ka kahon sa mga dokumento gikan sa opisina sa mitaliwan na nga si Department of Public Works and Highways (DPWH) Undersecretary Maria Catalina Cabral.
Sumala sa iyang abogado sa usa ka pamahayag kagahpong adlawa, gipakita matod pa ni Cabral ang maong mga kahon ngadto kanila sa wala pa kini namatay, diin sulod niini ang mga mahinungdanong bahin sa DPWH Annual Budget Proposal gikan sa tuig 2023 hangtod 2025.
Gimandoan matod pa ni Cabral ang iyang abogado nga pilion ang mga importanteng dokumento, apan wala pa kini napasa ngadto sa iyang pamilya o sa legal team hangtod karon.
Kahinumduman nga si Cabral usa sa mga opisyal sa DPWH nga gitudlo nga nalambigit sa giingong korapsyon sa flood control projects sa nasod—usa ka pasangil nga hugot nga gihimakak sa iyang kampo.
Napalgan nga wala na’y kinabuhi si Cabral sa miaging bulan didto sa Kennon Road sa Tuba, Benguet, diin gituohan nga pagpakamatay ang hinungdan sa iyang kamatayon.
Gikumpirma usab sa kampo ni Cabral ngadto sa Office of the Ombudsman nga adunay pipila ka dokumento gikan sa iyang opisina ang nakuha ni Batangas 1st District Representative Leandro Legarda Leviste, apan kinahanglan pa kini nga i-authenticate o kumpirmahin ang katinuoran tungod kay wala pa makita ang aktuwal nga kopya niini.