Nanawagan si António Guterres, Secretary-General sa United Nations, nga gikinahanglan buhaton ang tanang pamaagi aron hingpit nga malikayan ang dugang nga paglala sa kahimtangan sa Middle East.
Sumala niini, ang gihimong joint military operations sa United States ug Israel gikaingong posibleng nakalapas sa internasyonal nga balaod, lakip na ang United Nations Charter, nga nagbutang og limitasyon sa paggamit sa pwersa tali sa mga nasud.
Gikondena usab ni Guterres, ang pagbalos sa Iran, nga matud pa nakalapas sa soberanya ug teritoryo sa mga nasud sa rehiyon sa Gulpo, hilabina ang Bahrain, Iraq, Jordan, Kuwait, Qatar, Saudi Arabia, ug United Arab Emirates, ang mga nasud nga adunay presensya sa mga military base sa Amerika.
Sa laing bahin, mipahayag usab si Mike Waltz, United States Ambassador to the United Nations, nga legal ang mga aksyon sa Amerika.
Matud pa niini, dugay nang giila sa internasyonal nga komunidad ang prinsipyo nga dili angay maghupot og nuclear weapons ang Iran. Sigon usab ni Waltz, nga ang mga nangaging bayolente nga crackdown sa Iran batok sa kaugalingong mga lungsuranon nga nagprotesta.
Samtang, gibarugan usab sa Iran nga ang mga pag-atake nga miresulta sa pagkamatay sa mga sibilyan o residente giila isip paglapas sa internasyonal nga balaod, ug giisip kini nga mga war crimes.
Padayon usab ang panawagan sa United Nations alang sa kalma, dayalogo, ug pagtahod sa internasyonal nga balaod aron malikayan ang dugang nga kadaut ug pagkakalas sa kinabuhi.