Gibuksan kagahapong adlawa ang unang Malaybalay Livelihood Summit nga nagtumong sa pag awhag sa katawhan nga mosugod ug negosyo bisan sa gamay lang nga kapital ingon man sa paghatag ug dugang kahibalo sa panginabuhian.
Sa maong kalihukan, gipahimangnoan ni Congresswoman Arlyn Ayon nga ang pagsulod sa natad sa negosyo nanginahanglan og klarong marketing strategy aron makadani ug mga kostumer nga mogamit sa produkto.
Gidugang pa niini nga ang pagsugod sa gamay nga negosyo usa ka maayong lakang ug angay nga dili mawalaan ug paglaum sa mga kalisdanan nga mahimong masugatan.Sa laing bahin, malipayon si Marilyn Visto, residente sa Barangay 6 ning syudad ug usa sa mga benepisyaryo sa livelihood program nga nakig lambigit sa kalihukan.
Saysay pa niini, dako ang iyang kalipay tungod kay nakadawat siya og training uban sa TESDA, diin nakakat-on siya sa paghimo og atsara, tocino, ug uban pang pagkaon nga karon iyang gipalambo isip negosyo.
Gihangyo usab ni Visto ug sa mga opisyal sa summit ang publiko, ilabi na ang mga interesado sa pagnegosyo nga muapil sa ikaduha ug katapusang adlaw sa kalihukan karong adlawa nga gipahigayon sa Folk Arts Theater, Malaybalay City.
Alang sa mga gustong magpatabang ug makakat-on pa sa mga livelihood skills, gidasig usab nga makig-koordina sa TESDA aron matabangan nga makasugod ug makakuha ug dugang kahibalo sa pagnegosyo.