62 ka mga rebelde sa Bukidnon ang misurrender gikan Enero hangtod Disyembre 2025 tungod sa tinguha nga makabalik sa pamilya ug masiguro ang malinawong panginabuhi.
Sa pakighinabi sa Bombo Radyo Malaybalay kay BGen. Seigfred C. Tubalado, Commander sa 403rd Infantry “Peacemaker” Brigade sa Philippine Army. gipasabot niini nga pinaagi sa koordinasyon sa militar ug lokal nga kagamhanan, naengganyo ang mga rebelde sa pagbalik sa sabakan sa gobyerno pinaagi sa livelihood programs ug National Amnesty Program nga nagpasaylo sa ilang mga kaso.
Gidugang niya nga ginaseguro sa kasundaloan ang tinud-anay nga pagsurrender pinaagi sa profiling, pagsurender sa armas, ug deradicalization programs. Halos 50% sa mga misurrender babaye, kasagaran mga magtiayon, samtang kadaghanan sa mga kabatan-onan lalaki.
Sumala pa ni Tubalado, mas ubos na sa 20 ang nahibiling armado sa kabukiran sa Bukidnon, lakip ang ilang lider, ug pito na ang misurrender niining Enero 2026.