Tulo ka sunod-sunod nga insidente sa sunog ang natala sa mga kalasangan sa Malaybalay City niadtong Disyembre 12, 2025 sa hapon hangtod sa gabii, nga gilayon girespondehan sa City Forest Firefighters ubos sa City Environment and Natural Resources Office (City ENRO).
Ang mga insidente natigayon sa mga lugar sa Incalbog, Can-ayan Dinlayan Area, Tigbawan, Can-ayan ug Water District Area sa Kalasungay.
Base sa report, gibana-banang 1.5 ka ektarya nga kasagbotan ang nasunog, lakip ang tulo ka punoan sa pine tree ug lima ka kawayan sa Tigbawan, Can-ayan.
Sa pagkakaron, nagpahigayon ang City ENRO og hugot nga imbestigasyon aron masuta ang hinungdan sa mga sunog, diin gidudahang hinimo sa tawo ilabina ang open burning alang sa pag-andam sa yuta sa pagtikad og mais.
Gipasidaan sa City ENRO nga ang open burning, kon dili makontrol, mahimong mosangpot sa mas dakong sunog nga makadaot sa tibuok kalasangan sa syudad nga daghan og pine trees.
Gani, gi-awhag ang publiko nga likayan ang open burning ug magtinabangay sa pagpanalipod sa kalasangan.