Nagbahad si US Pres. Donald Trump ug ang nasud sa Iran nga posibleng mulala ang tensyon tali nila, ilabi na kung targeton ang mga energy ug fuel facilities sa Gulf.
Kini mahimo’g makaapekto sa global energy supply, financial markets, ug magpahinabo og regional crisis.
Nagpasidaan usab ang Iran niadtong Domingo, Marso 22, 2026, nga andam silang targeton ang imprastraktura sa United States, lakip na ang mga energy facility sa Gulf, kung ipadayon ni Trump ang iyang mga hulga.
Samtang nagpadayon ang tensyon, padulong gihapon sa rehiyon ang mga puwersa sa U.S., lakip ang United States Marine Corps ug mga mabug-at nga landing craft.
Sumala kang market analyst nga si Tony Sycamore sa IG Group, naghatag na og dakong kabalaka sa merkado ang mga hulga ni Trump.
Matud ni Sycamore, ang maong hulga mura’g “48-oras nga ticking time bomb” sa kawalay kasigurohan sa merkado.
Kung dili kini bawion, posible nga masinati ang usa ka “Black Monday” sa pagbalik sa global equity markets, diin posibleng mokunhod pag-ayo ang presyo sa stocks ug mosaka pag-ayo ang presyo sa lana.
Sa pikas bahin, gibutyag ni United States President Donald Trump nga dili siya mouyon sa ceasefire batok sa Iran, ug gipaambit nga hapit na makab-ot sa Amerika ang ilang tumong sa tulo-ka semana nga gubat.