Gimandoan ni U.S. President Donald Trump ang iyang mga senior special forces commander nga sugdan na ang paghimo og “contingency plans” alang sa posibleng pag-atake o paglusob sa Greenland.
Kini nga lakang giingong nakasugat og pagsupak gikan sa pipila ka taas nga opisyal sa militar nga nagduhaduha sa legalidad ug sa politikanhong aspeto sa maong plano. Matud pa, ang mga “hawk” o ang mga opisyal nga pabor sa agresibong aksyon sa palibot sa Presidente gusto nga molihok dayon aron mailog ang isla sa dili pa kini unhan sa Russia o China.
Gipadayag usab ni Trump nga ang Greenland maoy solusyon sa kakuwang sa Estados Unidos sa “rare earth elements.” Bisan pa niini, hugot nga nibalibad ang mga lider sa Greenland ug niingon nga dili nila gusto nga mahimong Amerikano o Danés, kondili gusto nila magpabilin nga mga Greenlanders.
Ang maong plano ni Trump nakadawat usab og pagsaway gikan sa mga nasod sa Europe, nga nagpasidaan nga kini mahimong hinungdan sa pagkahugno sa NATO.