Gipadayag ni U.S. President Donald Trump ang iyang opisyal nga pag-endorso kang Japan Prime Minister Sanae Takaichi dungan sa nagkaduol nga snap election sa Japan karong Dominggo.
Pinaagi sa usa ka post sa Truth Social, gihulagway ni Trump si Takaichi nga usa ka lider nga “lig-on, maalamon ug tinuoray nga nahigugma sa iyang nasud.”
Matud sa presidente, masaligon siya nga panalipdan ni Takaichi ang interes sa mga Hapon.Bisan kon giisip nga talagsaon ang direktang pagpanghilabot sa usa ka U.S. President sa politika sa ubang nasud, dili kini ang unang higayon nga naghimo niini si Trump.
Una na niining gihatagan og suporta silang Presidente Javier Milei sa Argentina ug Viktor Orban sa Hungary.Sukad milingkod si Takaichi niadtong Oktubre, mas gipahuptan ang relasyon sa duha ka lider. Gawas sa mga state visit, nagkahiusa ang duha sa pagpalig-on sa depensa ug pagpirma og kasabutan sa rare earths nga ilang gitawag nga sinugdanan sa “Golden Age” sa alyansa sa US ug Japan.
Sumala sa mga analista, ang maong lakang ni Trump nagsilbi usab nga mensahe batok sa China tungod sa nagkakusog nga tensyon sa rehiyon, ilabi na sa isyu sa Taiwan.
Bisan pa man sa dakong kahigayonan nga modaug, gipaabot nga mag-atubang si Takaichi og hagit sa pagpausbaw sa ekonomiya sa Japan ug sa pagdumala sa mabinantayon nga relasyon tali sa Washington ug Beijing.