Gibarugan ni US President Donald Trump nga kinahanglan makuha sa Amerika ang Greenland aron mapunggan ang Russia ug China nga himuon kini.
Giinsistir niini ang pagdepensa sa Greenland ug gikaingong buhaton ang tanan sa labing dali o sa taliwala sa lisod nga pamaagi.
Kahinumdoman nga una nang gipadayag sa White House nga gikonsidera sa Trump administration nga paliton ang Greenland nga kontrolado sa Denamark isip autonomous territory niini apan wala usab niini gisalikway ang opsyon nga himuon kini og annex sa pwenirsang pamaagi.
Bisan pa, ang Denmark ug Greenland miinsistir nga ang teritoryo dili ibaligya.
Gipasidan-an usab sa Denmark nga kung ilusad ang aksyong militar batok sa ilang nasud, kini magsenyas sa pagtapos sa defense alliance nga North Atlantic Treaty Organization (NATO), diin pareho nga myembro ang US ug Denmark.
Gibalikbalik ni Trump ang pag-ingon nga ang lokasyon sa Greenland importante sa nasudnong seguridad sa America, diin gilibutan matud kini sa mga barko sa China ug Russia sa tanang bahin, apan wala’y igong ebidensya alang niini nga alegasyon ni Trump.
Ang Greenland nahimutang usab taliwala sa North America ug sa Arctic, mao nga kini usa ka maayong lokasyon alang early warning systems kung adunay mga missile attacks ug aron mabantayan ang mga barko sa dagat nga naglibot sa rehiyon.
Ubos sa kasamtangan nga kasabutan tali sa US ug Denmark, ang US adunay gahum sa pagpadala sa daghang mga tropa sa Greenland kung gustohon niini.
Sa usa ka pamahayag kaniadtong Biyernes sa gabii, ang mga lider sa partido sa Greenland, kauban ang oposisyon, misubli sa pagsupak nga mahimong ubos sa kontrol sa Amerika ug miinsistir nga ang kaugmaon sa Greenland kinahanglan nga desisyonan sa mga residente sa Greenland.