Giila sa Quiapo Church ang bag-o lang nahuman nga Traslacion 2026 isip “record-breaking” human kini nakarekord og pinakadaghang deboto ug pinakahinay nga dagan sa andas sa kasaysayan sa maong tinuig nga prosesyon.
Matud pa ni Father Robert Arellano, ang spokesperson sa Nazareno 2026, miabot sa 9.64 milyones ka mga deboto ang misalmot sa nagkalain-laing aktibidad sa simbahan sugod pa niadtong Disyembre 31, 2025. Mas taas kini kon itandi sa 8 milyones nga participante niadtong 2025.
Tungod sa kadaghan sa tawo, ang prosesyon nilungtad og sobra sa 30 ka oras o kapin sa usa ka adlaw ang pinakadugay nga natala sa kasaysayan. Taliwala sa kalampusan sa relihiyosong kalihokan, upat ka kinabuhi ang nakalas.
Tulo niini mga deboto nga lalaki nga nag-edad og 30 hangtod 40 anyos. Giklaro usab sa simbahan nga ang photojournalist nga namatay samtang nagtrabaho wala giisip nga “casualty” sa Traslacion tungod kay wala kini direktang kalabutan sa dagan sa aktibidad.
Gawas sa mga namatay, nakatala usab ang Quiapo Church og 1,057 ka mga medical cases sama sa mga samaran ug nakuyapan. Bisan pa man niini, gipahayag sa simbahan nga hapsay ug malinawon ang kinatibuk-ang dagan sa seguridad sa tibuok prosesyon.